Deur : Skriba  /  June 11th, 2020

Liewe Gebedsvriende en familie

Die laaste paar weke leer ons baie spesifiek oor die Goeie Herder wat sorg vir Sy skape, Mense-Skape uit verskille agtergronde en denominasies, maar almal van ons moet leer om die Goeie herder se stem te hoor en in Sy leiding te bly sodat Hy verheerlik kan word en daar seën in gehoorsaamheid kan wees. Vir ons persoonlik is dit ‘n daaglikse tree-vir=tree volg van ons Herder.

Die bediening in die grendeltyd tyd bly redelik dieselfde met aanlyndienste, selbyeenkomste en kosverspreiding wat steeds voortduur. Lome is gereeld besig met beradingsgesprekke op die stoep in ‘n oop ruimte en gaan binnekort die kommunikasie kursus  vir 2 gemeentelede aanbied. Bid asb vir groei en insig in hierdie tyd.

Die afgelope naweek het ‘n voormalige gemeentelid van 29jaar oud onverwags gesterf na ontwatering. Haar 1 dogtertjie bly by gemeentelede en sal spelterapie moet ontvang om haar mamma se dood te verwerk, Sy is 8 jaar oud en baie deurmekaar. Daar is ook 2 kleiner kindertjies wat nou versorging benodig. Bid asb vir hierdie uitgebreide Soobramoney familie wie se verlies groot is in hierdie tyd.

Gedurende hierdie grendeltyd het daar n 2/3 verdieping gebou verrys langs die kerk wat ontwikkel is deur ons M-buurman. Die gekap-kap en voortdurende beweging en stof het ons met tye moedeloos gehad, maar ons is dankbaar,  veral vir Hesme se onthalwe, dat die projek einde se kant toe staan,  Binnekort gaan ons waarksynlik 6 M-gesinne langs die kerk hê wat elke Sondag onder die geklank van die Woord sal wees. Bid asb dat ons Here Jesus elkeen van hulle met die hand sal kies en ons maklik sal kan uitreik na hulle, Ons het ook nuwe M bure wat oorkant die pad ingetrek het verlede week ontmoet. Bid asb ook vir hierdie verhouding om te groei.

Ons loof die Here vir 3 Tomatis Terapeutiese Luister sessies wat Hesme kon doen, wat help met haar integrasie van klanke. Bid asb saam met ons vir nuwe neuronbreinpaadjies om te vorm en sodoende haar klank sensitiwiteit verbeter.Bid asb steeds vir haar intergrasie en terug gaan skooltoe nadat sy moes tuisbly vir terapie. Ons beleef baie genade vir haar.

Dawid geniet sy Aktuariële Wetenskappe kursus en werk baie hard en beleef baie seën en genade. Hy studeer steeds aanlyn van die huis af, ‘n bonusjaar vir ons almal saam met hom.

Dis ons gebed dat elkeen van julle veilig sal wees en die genade en vrede van ons Here Jesus baie spesiaal sal ervaar, en dat ons almal saam Mens-Skape sal wees wat luister na ons Herder se stem.

 

Baie liefde en Seënwense

Wessel en Lomé Cronje

 

VANUIT DIE PROJEKSPAN:

Ons begin in Oktober weer met byeenkomste as Projekspan.  Bid asb vir insig en leiding van die Heilige Gees oor hoe die pad vorentoe moet lyk.

Bid asb dat ons as gelowiges se lewens anders sal lyk as die van die wêreld s’n.  Bid asb dat wat ons met ons tyd, harte en geld doen, tot eer van Jesus sal wees.

Bid asb vir ons uitreikspan wat ook nou weer geleidelik begin kontak maak met hulle M vriende.  Bid asb vir wysheid en beskerming.

AS MENSE WERK, WERK MENSE, MAAR AS MENSE BID WERK GOD.
Baie dankie dat jy bid.

Lona Liebenberg

PROJEKSPAN

 

 

ONS EREDIENSTE HET BEGIN!!